Curaçao Clean Up ta hasi un yamada na komersio, instansia partikular, skolnan, instansia públiko, sentronan di bario, iglesianan i prensa pa ban limpia Kòrsou
Luna di sèptèmber ta luna di Limpiesa i Curaçao Clean Up durante e luna aki ta rekordá un i tur riba e importansia di limpiesa di nos pais. Curaçao Clean Up ta hasi un yamada na hinter komunidat spesialmente komersiantenan, skolnan, organisashonnan deportivo/sosial, sentronan di bario, iglesianan, bisiñanan, prensa i gruponan di interes pa partisipá na e akshon mundial di limpiesa di e luna aki. Organisá bo grupo, registrá na www.worldcleanupdaycuracao.org pa e djasabra, 18 di sèptèmber, pa hasi bo aria limpi i mantené limpi. Probechá di hasi e evento di limpiesa mundial aki mesora un evento sosial (teniendo kuenta ku tur regla vigente di Covid) ku sigur lo kontribuí na relashonnan sano.
Un isla limpi ta bon pa nos tur su salú, (sushi ta trese tur sorto di bestia i insekto), pa nos ekonomia, (kòrda riba turismo: un turista reklamá ku Kòrsou ta sushi ta mal propaganda pa nos isla). Ta bon pa nos laman(turismo di sambuyá) artefaktonan di plèstik ta mata bida bou di laman.
Aktualmente e problema di sushedat mas grandi, ta e shushi ku ta dualu, paso outomobilístanan ta tira shushi for di outo i esaki ta bula bai pega den e matanan kantu di kaminda. Esnan ku ta kore nan ruta di tur dia no ta ni mira esaki mas. Curaçao Clean Up ta alertá riba e siegedat di sushi (‘trash blindness’) aki. Tiramentu di sushi ilegal den mondi tambe ta un problema ku ta trese malesa, paso shushi den mondi ta trese plaga.
E aña aki ta di 9 bes ku Curaçao Clean Up ta organisá un limpiesa nashonal riba e dia Mundial di Limpiesa,hdjasabra, 18 di Sèptèmber próksimo, for di 7 or pa 11 or di mainta. E aktividat ta un akto simbóliko pa sigui konsientisá komunidat riba e importansia di un isla limpi. Huntu ku 180 pais, Kòrsou tambe ta bai forma parti di e evento mundial di limpiesa mas grandi ku ta e ‘World Clean Up Day’ 2021.
Kòrsou bo tin dushi hende i nos stima nos isla. Ban bira mas konsiente ku nos mester keda tene nos isla limpi. Ban p’è!
Registrá awor na www.worldcleanupdaycuracao.org
Saludo kordial,
Direktiva Fundashon Curacao Clean Up
Tel. 5154169