“Join the biggest movement in the world” Fundashon Curaçao Clean Up (CCU) ta den preparashon kompleto pa e gran dia mundial di limpiesa djasabra awor 18 sèptèmber, hunt ku 180 pais mas.
Djasabra ùltimo tabatin e mainta di informashon ku kordinadornan ku a bai den un bon esfera. Tur dia e fundashon t’ei pa kontestá tur pregunta ,prosesá tur aplikashon di tur partisipante p’asina tur boluntario tin un espasio pa limpia un pida di nos dushi baranka. Djasabra awor dia 18 sèptèmber awo, for di 7 or te ku 11 or di mainta riba diferente aria e trabounan di limpiesa ta tuma lugá rònt Kòrsou,for di Wèstpunt te ku Oostpunt.
Kuida
Fundashon CCU ta rekòrdá tur partisipante pa tene kuenta ku reglanan eksistente di Covid, esta pa tene e distansia, bisti tapaboka kaminda ta nesesario i tambe limpia e mannan. Ademas kada persona mester kuida su mes di solo tambe bisti pèchi i krema pa kurpa kontra solo i mester kòrda keda bebe awa konstante. Tambe e fundashon keda rekordá tur hende ku ta traha banda di e kaya, pa apuntá un boluntario pa wanta e tráfiko.
Lèntfel habrí i gratis
Tur grupo ta risibí saku pa hinka e sushi aden; hantskun i algun hèrment, pa hasi limpiesa, ademas tin bakinan den sierto arianan i trùknan ku lo kore tur e arianan ku tin limpiesa pa hiba e shushi rekohé, tantu pa lèntfel Malpais i Koraalspecht. Tur dos lèntfel ta habrí hinter dia i entrada pa bai tira sushi e dia ei ta GRATIS pa tur partsipante registrá na e “World Clean Up Day”. Por sigui hasi uso di lèntfel manera a akordá ku e organishon.
Danki
Curacao Clean Up ta gradisí un I tur ku ta kontribuyendo ku e akshon di limpiesa mundial djasabra awor i ta desea tur partisipante un dushi mainta di limpiesa djasabra awor! DANKI KORSOU!!!
Atentamente,
Fundashon Curacao Clean Up
Sharo Bikker, tel 5154169