Nos a demostrá ku nos ta dushi hende. Ban mantené nos isla limpi.
Djasabra 18 di sèptèmber, a tuma lugá e ‘World Clean Up Day’ 2021, Kòrsou a forma parti huntu ku 180 pais mas di e evento sosial mas grandi na mundu. Despues di algun luna di preparashon, Curaçao Clean Up por bisa ku e dia tabata unu eksitoso. Curaçao Clean Up ta hopi satisfecho kon e mainta di limpiesa a bai ku boluntarionan ku a rekohe shushi rònt Kòrsou for di Bandariba te Bandabou. Komo 2400 boluntario a partisipá na e mainta di limpiesa aki na 95 lokashon den tur bario di Kòrsou. E kantidat di shushi ku a rekohe a pasa 300 mil kilo. Den transkurso di siman nos lo tin e kantidat definitivo. Atrabes di e 9 añanan a rekohe mas di 3,2 mion riba nos isla ku un total di 21.000 boluntario.
DANKI na TUR boluntario ku e aña aki atrobe a hasi limpiesa tantu riba tera komo bou di laman. Danki na komersio, instansia, bario, gruponan sosial i deportivo, skol i individualnan ku a partisipá ku un gran motivashon i amor pa hasi nos isla limpi. Danki spesial na Prensa en general, Ministerio di GMN, CTB ,MCB ku for di un prinsipio a kere den e meta. Tambe na tur kontratista ku a duna un man riba e dia aki. Sin nan e dia aki lo no tabata un éksito.
Curaçao Clean Up ta spera ku despues di djasabra último ,nos lo sa pa sigui tene Kòrsou limpi. Un isla limpi ta na bienestar di nos salú i nos ekonomia.
Ban keda kòrda ku e isla ta di nos tur i ta nos tur mester mantené limpi .
Ban sigi tene nos wowo habrí pa kada sushi ku nos mira rònt di nos.
Ban stòp ku tiramentu di shushi for di nos outo.
Ban sigui konsientisá nos komunidat pakiko nos mester biba riba un isla limpi.
Si kada bario,skol, instansia organisashon i negoshi tene su aria limpi nos lo logra tene nos isla limpi .
Un be mas DANKI na un tur ku a kontribuí pa Curacao Clean Up logra e meta pa un Kòrsou limpi.
Otro aña ta kumpli 10 aña ku Curaçao Clean Up ta organisá e aktividat nashonal di limpiesa i ta di 5 aña ku ta partisipá na e ‘World Clean Up Day’.
Atentamente,
Fundashon Curacao Clean Up
Sharo Bikker, tel 5154169